ક્રિકેટ જગતમાંથી એક અત્યંત દુઃખદ સમાચાર સામે આવ્યા છે. કર્ણાટકના પૂર્વ ફાસ્ટ બોલર એસ.એલ. અક્ષયનું બેંગલુરુમાં ક્લબ મેચ દરમિયાન હૃદયરોગના હુમલાને કારણે નિધન થયું છે. માત્ર 39 વર્ષની વયે તેમના અચાનક અવસાનથી સમગ્ર ક્રિકેટ વર્લ્ડમાં શોકની લાગણી પ્રસરી ગઈ છે.
મેચ દરમિયાન અચાનક બગડી તબિયત
રવિવારે બેંગલુરુમાં KSCA થર્ડ ડિવિઝન લીગ મેચ રમાઈ રહી હતી. આ મેચમાં SL Akshay સૈફાયર CC ટીમ તરફથી રમી રહ્યા હતા. મેચ દરમિયાન તેમણે ચાર ઓવર બોલિંગ પણ કરી હતી.
પરંતુ બોલિંગ પૂર્ણ કર્યા બાદ તેમને અચાનક છાતીમાં દુખાવો અને ગભરામણ અનુભવાઈ હતી. તબિયત વધુ બગડતા તેમને તરત હોસ્પિટલ ખસેડવામાં આવ્યા હતા, જ્યાં ડોક્ટરોએ તેમને મૃત જાહેર કર્યા હતા.
રણજી ટ્રોફી વિજેતા ટીમના સભ્ય
SL Akshay કર્ણાટકની 2014-15 રણજી ટ્રોફી વિજેતા ટીમનો મહત્વનો ભાગ રહ્યા હતા. તેમણે 2011 થી 2013 દરમિયાન કર્ણાટક માટે ફર્સ્ટ ક્લાસ, લિસ્ટ-A અને T20 ક્રિકેટમાં પ્રતિનિધિત્વ કર્યું હતું.
તેમણે પોતાની કારકિર્દીમાં 6 ફર્સ્ટ ક્લાસ મેચોમાં 18 વિકેટ ઝડપી હતી અને ઘરેલું ક્રિકેટમાં પોતાની આગવી ઓળખ બનાવી હતી.
નિવૃત્તિ બાદ બન્યા કોચ
ક્રિકેટમાંથી નિવૃત્તિ લીધા બાદ પણ અક્ષય રમત સાથે સતત જોડાયેલા રહ્યા હતા. તેઓ કર્ણાટક અંડર-19 ટીમના કોચ તરીકે યુવા ખેલાડીઓને તાલીમ આપી રહ્યા હતા.
KSCAએ તેમના નિધન પર દુઃખ વ્યક્ત કરતાં જણાવ્યું કે અક્ષયે ખેલાડી અને કોચ બંને રૂપે કર્ણાટક ક્રિકેટમાં મહત્વપૂર્ણ યોગદાન આપ્યું હતું.
ક્રિકેટ જગતમાં શોકની લાગણી
SL Akshay ના અચાનક નિધનથી પરિવારજનો, મિત્રો અને ક્રિકેટ ચાહકોમાં શોકનું મોજું ફરી વળ્યું છે. સોશિયલ મીડિયા પર અનેક ક્રિકેટરો અને ચાહકોએ તેમને ભાવભીની શ્રદ્ધાંજલિ પાઠવી છે.
તેમનો ક્રિકેટ પ્રત્યેનો જુસ્સો અને યુવા ખેલાડીઓને આગળ વધારવાનો પ્રયાસ હંમેશા યાદ રહેશે.