Crude Oil Price: આંતરરાષ્ટ્રીય બજારમાં કાચા તેલના ભાવમાં ભારે ઘટાડો નોંધાયો છે. અમેરિકા અને ઈરાન વચ્ચે સંભવિત શાંતિ કરારની આશાએ ક્રૂડ ઓઇલની કિંમતો બે અઠવાડિયાના સૌથી નીચા સ્તરે પહોંચી ગઈ છે. આ ઘટાડો ભારત માટે મોટી રાહત સમાન માનવામાં આવી રહ્યો છે.
બ્રેન્ટ ક્રૂડ 100 ડોલરથી નીચે
Crude Oil Price: સોમવારે બ્રેન્ટ ક્રૂડના ભાવમાં લગભગ 4.55 ટકાનો ઘટાડો નોંધાયો હતો, જેના કારણે ભાવ પ્રતિ બેરલ 98.83 ડોલર સુધી પહોંચી ગયો. બીજી તરફ અમેરિકન WTI ક્રૂડ પણ લગભગ 4.73 ટકા ઘટીને 92.03 ડોલર પ્રતિ બેરલ પર ટ્રેડ થતો જોવા મળ્યો.
વિશેષજ્ઞો મુજબ 7 મે પછી પહેલીવાર ક્રૂડ ઓઇલ આટલા નીચા સ્તરે પહોંચ્યું છે.
અમેરિકા-ઈરાન શાંતિ કરારની અસર
કાચા તેલના ભાવમાં ઘટાડાનું મુખ્ય કારણ અમેરિકા અને ઈરાન વચ્ચે વધતી શાંતિ ચર્ચાઓને માનવામાં આવી રહ્યું છે. અમેરિકાના રાષ્ટ્રપતિ ડોનાલ્ડ ટ્રમ્પે સંકેત આપ્યા છે કે બંને દેશો વચ્ચે સમજૂતી માટેની વાતચીત અંતિમ તબક્કામાં પહોંચી ગઈ છે.
જો આ કરાર સફળ થાય તો મધ્ય પૂર્વના મહત્વપૂર્ણ દરિયાઈ માર્ગ હોર્મુઝ સ્ટ્રેટ પરનો તણાવ ઘટી શકે છે.
ભારત માટે કેમ મહત્વપૂર્ણ?
ભારત પોતાની ઊર્જા જરૂરિયાત માટે મોટા પ્રમાણમાં આયાત કરેલા ક્રૂડ ઓઇલ પર નિર્ભર છે. હોર્મુઝ સ્ટ્રેટ દ્વારા વિશ્વના લગભગ પાંચમા ભાગનું તેલ અને LNG સપ્લાય થાય છે. આ માર્ગ સુરક્ષિત રહે તો ભારતને પેટ્રોલ, ડીઝલ અને LPG સપ્લાયમાં મોટી રાહત મળશે.
છેલ્લા કેટલાક દિવસોમાં ક્રૂડ મોંઘું થતાં દેશમાં પેટ્રોલ-ડીઝલના ભાવમાં સતત વધારો થઈ રહ્યો હતો. હવે ક્રૂડ સસ્તુ થતા આગામી સમયમાં ઈંધણના ભાવ સ્થિર રહેવાની આશા વધી છે.
LPGની કમીનો ખતરો પણ ટળ્યો
વિશેષજ્ઞોનું કહેવું છે કે જો હોર્મુઝ સ્ટ્રેટ ફરી સંપૂર્ણ રીતે કાર્યરત રહે તો ભારતમાં LPG સપ્લાય પર કોઈ મોટી અસર નહીં પડે. એટલે ઘરેલુ ગેસ સિલિન્ડરની કમીનો ખતરો હાલ ટળી ગયો છે.
હજુ પણ સાવચેતી જરૂરી
જોકે બજારમાં સકારાત્મક માહોલ જોવા મળી રહ્યો છે, તેમ છતાં નિષ્ણાતો માને છે કે હજુ સંપૂર્ણ રાહત માનવી વહેલી થશે. અમેરિકા અને ઈરાન વચ્ચે કેટલીક જટિલ બાબતો પર ચર્ચા ચાલુ છે અને અંતિમ કરાર હજુ બાકી છે.
જો ચર્ચાઓ સફળ રહેશે તો વૈશ્વિક બજારમાં કાચા તેલના ભાવમાં વધુ સ્થિરતા જોવા મળી શકે છે.
આ પણ વાંચો:- America-Iran Relations : ટ્રમ્પની મોટી જાહેરાત, ઈરાન સાથેના પરમાણુ કરાર પર શું થશે નિર્ણય?