દેશભરમાં ફરી એકવાર પેટ્રોલ અને ડીઝલના ભાવમાં વધારો કરવામાં આવ્યો છે. આંતરરાષ્ટ્રીય બજારમાં ક્રૂડ ઓઇલના ભાવ સતત વધી રહ્યા હોવાથી જાહેર ક્ષેત્રની પેટ્રોલિયમ કંપનીઓએ ઈંધણના રિટેલ ભાવમાં વધારો કર્યો છે. છેલ્લા 10 દિવસમાં આ ચોથી વખત ભાવ વધારો નોંધાયો છે, જેના કારણે સામાન્ય લોકોના રોજિંદા ખર્ચમાં વધારો થયો છે.
પેટ્રોલ અને ડીઝલના નવા ભાવ
નવી કિંમત મુજબ દિલ્હીમાં પેટ્રોલનો ભાવ પ્રતિ લિટર ₹102.12 સુધી પહોંચી ગયો છે, જ્યારે ડીઝલ ₹95.20 પ્રતિ લિટર વેચાઈ રહ્યું છે. પેટ્રોલના ભાવમાં ₹2.61 અને ડીઝલમાં ₹2.71 નો વધારો નોંધાયો છે.
મુંબઈ, કોલકાતા અને ચેન્નાઈ જેવા મોટા શહેરોમાં પણ પેટ્રોલના ભાવ ₹100ને પાર પહોંચી ગયા છે.
મોટા શહેરોમાં નવા ભાવ
- દિલ્હી : પેટ્રોલ ₹102.12 | ડીઝલ ₹95.20
- મુંબઈ : પેટ્રોલ ₹111.21 | ડીઝલ ₹97.83
- કોલકાતા : પેટ્રોલ ₹113.51 | ડીઝલ ₹99.82
- ચેન્નાઈ : પેટ્રોલ ₹107.77 | ડીઝલ ₹99.55
કેમ વધી રહ્યા છે ઈંધણના ભાવ?
પશ્ચિમ એશિયામાં ચાલી રહેલા તણાવ અને હોર્મુઝ સ્ટ્રેટ પર ઉભી થયેલી પરિસ્થિતિને કારણે વૈશ્વિક બજારમાં ક્રૂડ ઓઇલના ભાવમાં ભારે ઉછાળો આવ્યો છે. હોર્મુઝ સ્ટ્રેટ વૈશ્વિક તેલ સપ્લાય માટે અત્યંત મહત્વપૂર્ણ દરિયાઈ માર્ગ ગણાય છે. અહીં ઉભી થયેલી અસ્થિરતાના કારણે તેલની સપ્લાય પર અસર પડી રહી છે.
વિશ્લેષકોના જણાવ્યા મુજબ, છેલ્લા કેટલાક અઠવાડિયામાં ક્રૂડ ઓઇલના ભાવમાં 50 ટકા સુધીનો વધારો નોંધાયો છે, જેનો સીધો પ્રભાવ ભારતના પેટ્રોલ અને ડીઝલના ભાવ પર પડી રહ્યો છે.
CNGના ભાવમાં પણ વધારો
પેટ્રોલ અને ડીઝલ ઉપરાંત CNGના ભાવમાં પણ સતત વધારો થઈ રહ્યો છે. દિલ્હીમાં CNG હવે ₹81.09 પ્રતિ કિલોગ્રામ થઈ ગયું છે. છેલ્લા 10 દિવસમાં CNGના ભાવમાં કુલ ₹4નો વધારો નોંધાયો છે.
સામાન્ય જનતા પર વધશે બોજ
ઈંધણના ભાવમાં સતત વધારો થવાથી ટ્રાન્સપોર્ટેશન ખર્ચ વધવાની શક્યતા છે. તેના કારણે શાકભાજી, દૂધ, અનાજ અને અન્ય આવશ્યક ચીજવસ્તુઓના ભાવમાં પણ વધારો થઈ શકે છે. નિષ્ણાતો માને છે કે જો આંતરરાષ્ટ્રીય સ્તરે ક્રૂડ ઓઇલના ભાવમાં ઘટાડો નહીં થાય તો આગામી દિવસોમાં વધુ ભાવ વધારો થઈ શકે છે.